Duesma edituro di mikra antologio kontenanta 78 Ido-poem(et)i (maxim-granda-parte originala) da 12 skripteri de 8 landi (Belgia, Francia, Germania, Japonia, Latvia, Polonia, Ukraina, Suedia): Sato Kozi (20), Ausma Pormale (14), Mirosław Więchowski (10), Andreas Juste (7), Louis Pascau (7), Valdis Sprogis (7), Nikolay Gaponenko (5), Michel Bouts (4), Alex Rylander (1), Boris Aaronov (1), Hans Brismark (1), Heidi Neussner (1).

Kompare al unesma edituro (1981), ica duesma edituro kontenas plusa poemo da plusa poeto (Heidi Neussner) e nova komentaro da Tazio Carlevaro, en qua il i.a. citas olima auguro da Andreas Juste («Sempre, kande on previdis la fino di Ido, l’ Ido-mondo ritrovis forteso e kapableso rikomencar. Ido ritrovos nova vivo en l’ olda radiki») e parolas pri la recenta «renesanco dil Ido-kulturo», en qua on remarkas du nova fenomeni. Un-latere, «Nov autori, nov idei, nova spirito. Ma anke nova maniero difuzar kulturo. Nova kulturala homi, plu interesata pri la linguo, kam pri la movemento, plu aktiva en la produktado di kulturo, kam pri propago». Altra-latere, «La fakto, ke kelk autori skriptas anke en Esperanto. E forsan anke en altra lingui artificala».

plus-circle Add Review

comment

Reviews